XOGOS CON ROLOS DE PAPEL HIXIÉNICO RECICLADOS

1.Portalápis: Para crear este recurso, unicamente necesitaremos un rolo de papel hixiénico e témperas, rotuladores, pinturas de madeira ou ceras para decoralo (a elección do seu deseño é persoal de cada nen@). Tamén pode ser recomendable pegar un anaco de cartón nun dos extremos do rolo de papel con cola branca, para que actúe como soporte, e así evitar que unha vez que este instrumento teña lapis ou rotuladores no seu interior, se caia. Dous exemplos, máis sofisticados, poden ser o seguintes:

2.Marionetas: Como na actividade anterior, os rolos de papel hixiénico tamén poden utilizarse para crear e inventar distintas marionetas, que completarán as historias contadas e representadas na aula ou no fogar. Precisaremos un número indeterminado de rolos, en función das marionetas que se queiran construír, e pinturas de diferentes tipos (témperas, rotuladores, ceras, pinturas de madeira …).

3.Prismáticos: Outra nova actividade, que axudará aos máis pequen@s a centrar a súa atención e perfeccionar a súa observación, pode ser a xeración de prismáticos para ollar directamente a realidade e contorna. Para a súa elaboración, precisaremos dous rolos de papel hixiénico, un anaco de fío o la, pinturas de diferentes tipos, cartolinas de cores ou goma-eva. Dicir, novamente, que o deseño de cada prismático é persoal de cada alumn@. Dous exemplos poden ser o seguintes:

4.Técnicas artísticas: Neste caso, necesitaremos rolos de papel hixiénico; tesoiras; un soporte, que pode ser un folio ou unha cartolina branca;  e témperas de cores. Así, en primeiro lugar, colleremos cada rolo de papel e, por un extremo, cortarémolo dándolle a forma que desexemos. A continuación, mollaremos ese mesmo extremo en pintura e debuxaremos formas no soporte, de maneira que os nen@s experimenten tanto coas cores como co útil que están a usar. Para que esta explicación resulte sinxela, aquí dous exemplos:

5.Construcións: O desenvolvemento deste xogo necesitará rolos de papel hixiénico varios (un número indeterminado), unha tesoira e cores como témperas, rotuladores ou ceras (este último recurso é opcional, pero si recomendable para que os alumn@s se motiven). Primeiramente e logo de pintar (se así se desexa) cada rolo de papel, deberá collerse a tesoira e, en cada un dos seus extremos, facer un recorte pequeno. Levarase a cabo esta mesma acción nos outros rolos de papel, de xeito que poidan unirse polos seus extremos formando construcións irregulares. 

6.Circuíto: Aquí necesitaremos rolos de papel, cores, un soporte vertical como pode ser unha tablilla de madeira ou mesmo unha cartolina grande (A2), cola branca, bolas dun tamaño medio e un recipiente. Así pois, primeiramente os nen@s colorearán os rolos de papel como desexen; seguidamente, pegaranse no soporte seguindo unha liña recta ou curva (segundo se queira); e por último, tamén se pegará o recipiente que recollerá a bola ó final do circuíto. Unha vez feitas estas actuacións, introducirase no rolo de papel hixiénico inicial a/as bola/s que deberá/n recorrer a construción inventada chegando ó recipiente.

Este mesmo circuíto pode incluso valer para crear unha máquina de sumar e restar, importante para traballar a lóxica-matemática no alumnado de Educación Infantil do último curso (5-6 anos).

7.Sementes: Os rolos de papel hixiénico tamén poden ser interesantes para albergar no seu interior plantas de diversas formas. Cun pouco de terra, que será introducida no rolo de papel con axuda dunha pala pequena, e sementes de lentellas, chícharos, garbanzos ou doutro tipo de legume, os máis pequen@s poderán familiarizarse directamente cos coidados que precisa un ser vivo.

8.Cores: Para traballar a discriminación e clasificación de cores, así como a motricidade fina, pode ser interesante o desenvolvemento desta tarefa. Para ela, necesitaremos rolos de papel, cores e pompóns ou boliñas de papel de cores. A súa evolución comezará cando os alumn@s pinten os rolos de diferentes tonalidades e, a continuación e unha vez secos, introduzan no seu interior as bolas de papel ou os pompóns da mesma cor. Aquí un exemplo:

9.Series: Cortando un rolo de papel hixiénico pola metade, logo de pintalo ó gusto de cada nen@, pode crearse unha serie de cores, de números ou de letras. Para iso, precisaremos os rolos de papel, cores e un fío ou lá. Inicialmente, esta serie pode partir de dous elementos  para despois, progresivamente, ir introducindo máis.

10.Números: Outra opción é aprender a serie numérica con este instrumento. Con rolos de papel pintados de distintas tonalidades e pompóns ou bolas pequenas de papel de cores, os nen@s poden clasificar estes elementos en función do seu número. Este é un exemplo claro: